హీరో నందమూరి కళ్యాణ్ రామ్ (Nandamuri Kalyan Ram) ‘అమిగోస్’ (Amigos) అనే సినిమాను ప్రకటించగానే.. ఇదేం టైటిల్ అన్నారు చాలా మంది. నిజానికి దీని అర్థం అప్పుడు చాలా మందికి తెలీదు. అమిగోస్ అనేది స్పానిష్ పదం. ఒకే పోలికలతో ఉన్న అపరిచితులు స్నేహితులు అయితే వాళ్లను అమిగోస్ అంటారట. ఇలాంటి టైటిల్‌ను సైతం తమ ప్రమోషన్స్‌తో జనంలోకి తీసుకెళ్లారు. టీజర్, పాటలతో అంచనాలను పెంచారు. ఇప్పుడు ఈ సినిమా ట్రైలర్ విడుదలైంది. కర్నూలులో నిర్వహించిన ట్రైలర్ లాంచ్ ఈవెంట్‌లో ‘అమిగోస్’ ట్రైలర్‌ను విడుదల చేశారు.
‘అమిగోస్’ ట్రైలర్ చాలా ఆసక్తికరంగా ఉంది. సినిమాలో హీరో త్రిపాత్రాభినయం అనేది కొత్తేమీ కాదు. ‘జై లవ కుశ’లో జూనియర్ ఎన్టీఆర్ కూడా చేశారు. అయితే, ఈ సినిమాలో కళ్యాణ్ రామ్ పోషించిన మూడు పాత్రలు గత సినిమాలకు చాలా భిన్నంగా ఉన్నాయి. ముగ్గురు ఒకేలా ఉండే అపరిచితుల మధ్య జరిగే కథ ‘అమిగోస్’ అని ఇప్పటికే చెప్పారు. అయితే, ఈ ముగ్గురూ స్నేహితులుగా మారి బాగా దగ్గరవుతారు. కానీ, ఈ ముగ్గురిలో ఒకడి వల్ల మిగిలిన ఇద్దరికీ ప్రాణాపాయం పొంచి ఉంటుంది. ఆ ఒక్కడూ ఇండియన్ పాబ్లో ఎస్కోబార్ అట.
అమిగోస్ అనే టైటిలే విచిత్రంగా ఉంటే.. ఇదేంటి మళ్లీ ఇండియన్ పాబ్లో ఎస్కోబార్ అంటున్నారని అనుకుంటున్నారా? పాబ్లో ఎస్కోబార్ కరడుగట్టి నేరస్థుడు. కొలంబియాకు చెందిన పాబ్లో ఎస్కోబార్ ఒక డ్రగ్ లార్డ్, నార్కో టెర్రరిస్ట్. అప్పట్లో అమెరికాకు అక్రమంగా రవాణా అయ్యే కొకైన్‌లో 80 శాతం ఇతడి ముఠానే సరఫరా చేసేది. అతడితో కళ్యాణ్ రామ్ పోషించిన బిపిన్ పాత్రను పోల్చాడు దర్శకుడు. ఇండియన్ పాబ్లో ఎస్కోబార్ అంటే.. ఇండియాలో కరడుగట్టిన నార్కో టెర్రరిస్ట్ అన్నమాట. మరి అలాంటోదితో మరో ఇద్దరు కళ్యాణ్ రామ్‌లు ఎలాంటి ఇబ్బందులు ఎదుర్కొన్నారనేదే సినిమానా.. లేకపోతే ఇంకా ఏమైనా ట్విస్టులు, కనెక్షన్లు ఉన్నాయా అనేది ఫిబ్రవరి 10న థియేటర్లలో చూడాలి.
‘బింబిసార’తో బ్లాక్ బ‌స్టర్ హిట్ సాధించి బాక్సాఫీస్ ద‌గ్గర సత్తా చాటిన కళ్యాణ్ రామ్.. ‘అమిగోస్’తో మరోసారి మ్యాజిక్ చేయాలని చూస్తున్నారు. ఈ సినిమా ద్వారా కన్నడ బ్యూటీ ఆషికా రంగనాథ్ హీరోయిన్‌గా టాలీవుడ్‌కు పరిచయమవుతున్నారు. బ్రహ్మాజీ, సప్తగిరి, జయప్రకాశ్ తదితరులు నటించిన ఈ సినిమాను మైత్రీ మూవీ మేకర్స్ బ్యానర్‌పై నవీన్ యెర్నేని, వై.రవిశంకర్ నిర్మించారు. జిబ్రాన్ సంగీతం సమకూర్చారు. సినిమాలో జిబ్రాన్ నేపథ్య సంగీతం ఏ స్థాయిలో ఉండబోతోందో ట్రైలర్ చూస్తే అర్థమవుతోంది.
97582912
