రికార్డు లెవెల్లో చాట్జీపీటీ యూజర్లు… 
వెలుగు బిజినెస్ డెస్క్: లాంచ్ అయిన రెండు నెలల్లోనే పాపులర్ ఆర్టిఫిషియల్ ఇంటెలిజెన్స్ టూల్ చాట్జీపీటీ 10 కోట్ల యూజర్లను సంపాదించుకుని రికార్డు సాధించింది. సిమిలర్వెబ్ రిపోర్టు ప్రకారం జనవరి నెలలో రోజూ లక్షలాది మంది కొత్త యూజర్లను చాట్ జీపీటీ తెచ్చుకుందని పేర్కొంది. 10 కోట్ల యూజర్ల మార్కును అందుకోవడానికి సోషల్ మీడియా యాప్స్ ఇన్స్టాగ్రామ్కు రెండున్నరేళ్లు, టిక్టాక్కు 9 నెలలు పట్టిందని సిమిలర్వెబ్ ఈ రిపోర్టులో వెల్లడించింది. కిందటేడాది డిసెంబర్లోనే చాట్జీపీటీని లాంచ్ చేశారు. ఎలన్మస్క్ పెట్టుబడి పెట్టిన ఓపెన్ఏఐ ఈ చాట్ జీపీటీని డెవలప్ చేసింది. యూజర్ నుంచి ఇన్స్ట్రక్షన్ తీసుకుని దానికి వివరమైన బదులివ్వడంపై ఈ చాట్ బాట్కు ట్రెయినింగ్ ఇచ్చారు. యూజర్లు తమకు ఏం కావాలో ఫీడ్ చేస్తే చాలు….ఈ చాట్బాట్ రిప్లయ్ ఇచ్చేస్తుంది.
ఇంతలా దూసుకెళ్లిన కన్జూమర్ యాప్ లేదు…
20 ఏళ్ల ఇంటర్నెట్స్పేస్లో ఇంత వేగంగా దూసుకెళ్లిన కన్జూమర్ ఇంటర్నెట్యాప్ను చూడలేదని యూబీఎస్ రిసెర్చ్ చెప్పినట్లు సిమిలర్వెబ్ డేటా ప్రకటించింది. సిమిలర్వెబ్ అంచనాల ప్రకారం చాట్.ఓపెన్ఏఐ.కామ్ వెబ్సైట్ గత వారం రోజులలో రోజుకి 2.5 కోట్ల మంది విజిటర్లను ఆకట్టుకోగలిగినట్లు పేర్కొంది. నెల రోజులకి చూస్తే ఈ వెబ్సైట్ట్రాఫిక్ సగటున రోజుకి 3.4 శాతం పెరిగినట్లు వివరించింది. జనవరి 31 నాడు ఒక్క రోజునే ఈ వెబ్సైట్ను 2.8 కోట్ల మంది విజిటర్లు చూశారు. ఇందులో 1.57 కోట్ల మంది యూనిక్ విజిటర్లేనని సిమిలర్ వెబ్ తెలిపింది.
మార్కెట్లో చాట్ జీపీటీ సంచలనం చూసి గూగుల్ వంటి ఇంటర్నెట్ దిగ్గజాలు ఆశ్చర్యపోతున్నాయి. ఇటీవల జరిగిన ఎర్నింగ్స్ కాల్ లో ఆర్టిఫిషియల్ ఇంటెలిజెన్స్ శక్తి–సామర్ధ్యాల గురించి ఎనలిస్టులతో గూగుల్ సీఈఓ చాలా సార్లు మాట్లాడారు. ఏఐని వాడుకోవడానికి ప్రపంచం చాలా ఆసక్తితో ఎదురు చూస్తోందని సుందర్పిచాయ్ ఈ సందర్భంగా ప్రస్తావించారు. తాము ప్రస్తుతం పనిచేస్తున్న అత్యంత శక్తివంతమైన టెక్నాలజీ ఆర్టిఫిషియల్ ఇంటెలిజెన్సేనని అన్నారు. చాట్జీపీటీకి పోటీగా తాము ఒక ప్రొడక్టును డెవలప్ చేస్తున్నట్లు చైనా ఇంటర్నెట్ కంపెనీ బైదు ఇటీవలే ప్రకటించింది కూడా.
ఓపెన్ఏఐ సబ్స్క్రిప్షన్ మోడల్…
ఓపెన్ఏఐ ప్లస్మోడల్ పేరుతో సబ్స్క్రిప్షన్ మోడల్చాట్జీపీటీని ఇటీవలే ఓపెన్ఏఐ తెచ్చింది. ప్రస్తుతానికి అమెరికాలో మాత్రమే అందుబాటులో ఉండే ఈ మోడల్ కింద నెలకు 20 డాలర్లను సబ్స్క్రిప్షన్గా నిర్ణయించారు. పీక్టైమ్స్లో కూడా ప్లస్మోడల్ యూజర్లకు చాట్జీపీటీ సేవలు అందుబాటులో ఉంటాయి. అంతేకాదు, ప్లస్ యూజర్లకు వేగమైన రెస్పాన్స్, కొత్త ఫీచర్లకు ముందస్తు యాక్సెస్ వంటి ఎట్రాక్షన్లనూ ఇస్తున్నారు.
©️ VIL Media Pvt Ltd.
