RRR అందించిన అశేష విజయంతో గ్లోబల్ స్టార్ అయిపోయిన మెగా పవర్ స్టార్ రామ్ చరణ్ (Ram Charan).. ఇప్పుడు ప్రముఖ దర్శకుడు శంకర్ (Shankar) దర్శకత్వంలో మరో భారీ చిత్రంలో (RC15) నటిస్తున్నారు. రామ్ చరణ్ 15వ సినిమాగా తెరకెక్కుతోన్న ఈ చిత్రం షూటింగ్ ఇప్పటికే మొదలై శరవేగంగా జరుగుతోంది. ఆంధ్రప్రదేశ్‌తో పాటు న్యూజీలాండ్‌లోనూ షెడ్యూల్‌ను పూర్తిచేసుకుంది.
న్యూజీలాండ్‌లో రామ్ చరణ్, కియారా అద్వానీపై ఒక డ్యూయెట్‌ను చిత్రీకరించారు. దీని కోసం రూ.15 కోట్ల మేర ఖర్చుపెట్టినట్టు అప్పట్లో వార్తలు వచ్చాయి. అలాగే 500 మంది డాన్సర్లతో మరో పాట చిత్రీకరణను శంకర్ ప్లాన్ చేస్తున్నట్టు ప్రచారం జరుగుతోంది. ఇదిలా ఉంటే, తాజాగా మరో అప్‌డేట్ బయటికి వచ్చింది. హైదరాబాద్‌లోని చార్మినార్ వద్ద రేపటి నుంచి కొత్త షెడ్యూల్ ప్రారంభంకాబోతోంది. ఈ విషయాన్ని డైరెక్టర్ శంకర్ స్వయంగా ట్విట్టర్ ద్వారా వెల్లడించారు.
ఐకానిక్ చార్మినార్ వద్ద తరవాత షెడ్యూల్‌కు సిద్ధం చేస్తున్నామని శంకర్ ట్వీట్‌లో పేర్కొన్నారు. అంతేకాదు, చార్మినార్ వద్ద జరుగుతున్న పనులను చూపిస్తూ ఒక ఫొటో కూడా షేర్ చేశారు. ఈ ఫొటోలో శంకర్ కూడా కనిపిస్తున్నారు. అయితే, ఓల్డ్ సిటీలో రామ్ చరణ్ పాట షూటింగ్ ఉంటుందని గత రెండు రోజులుగా వార్తలు వస్తున్నాయి. బహుశా ఆ పాట షూటింగ్ చార్మినార్ వద్దే జరుగుతుందేమో. ఇది రామ్ చరణ్ సోలో సాంగ్ అట. ఇక్కడ షెడ్యూల్ పూర్తయిన తరవాత ఇదే పాట కోసం మళ్లీ రాజమండ్రి వెళ్తారని సమాచారం.
శంకర్ సినిమాలు ఎంత భారీగా ఉంటాయో.. ఆయన చిత్రాల్లోని పాటలు కూడా అంతే భారీగా ఉంటాయి. పాటల కోసమే ఆయన కోట్ల రూపాయల బడ్జెట్‌ను, ఎంతో సమయాన్ని కేటాయిస్తారు. ఈ సోలో సాంగ్ కూడా అంతే లావిస్ స్కేల్‌లో ఉంటుందని సమాచారం. సాధారణంగా శంకర్ సినిమాలకు ఎ.ఆర్.రెహమాన్ సంగీతం అందిస్తుంటారు. ఒక్క ‘అపరిచితుడు’ సినిమాకు హేరిస్ జయరాజ్ సంగీతం సమకూర్చారు. అయితే, ఈ సినిమా కోసం థమన్‌తో తొలిసారి శంకర్ కలిసి పనిచేస్తున్నారు. కాబట్టి, ఈ సినిమాలో పాటలు ఎలా ఉండబోతున్నాయనే ఆసక్తి చాలా మందిలో ఉంది.
ఈ సినిమాను శ్రీవెంకటేశ్వర క్రియేషన్స్ బ్యానర్‌పై దిల్ రాజు అత్యంత భారీ బడ్జెట్‌తో నిర్మిస్తున్నారు. రామ్ చరణ్ ఈ సినిమాలో ఐఏఎస్ ఆఫీసర్‌గా కనిపిస్తారని టాక్. అలాగే, ఫ్లాష్ బ్యాక్ ఎపిసోడ్ కూడా ఉంటుందట. అది పీరియడ్ సెటప్‌లో ఉంటుందని తెలుస్తోంది. సోషల్ డ్రామాగా రూపొందుతోన్న ఈ సినిమాలో రామ్ చరణ్ ద్విపాత్రాభినయం చేస్తున్నారని ప్రచారం జరుగుతోంది. కియారా అద్వానీ హీరోయిన్‌గా నటిస్తోన్న ఈ చిత్రంలో శ్రీకాంత్, సునీల్ కీలక పాత్రల్లో నటిస్తున్నారు.
