IND vs AUS 1st Test : ఆస్ట్రేలియా (Australia)తో ఆరంభమైన తొలి టెస్టు తొలి రోజు ఆటలో టీమిండియా (Team India) పై చేయి సాధించింది. తొలుత బౌలింగ్ లో ఆస్ట్రేలియాను తక్కువ స్కోరుకే ఆలౌట్ చేసిన టీమిండియా.. ఆ తర్వాత బ్యాటింగ్ కు దిగి అదరగొట్టింది. తొలి రోజు ఆట ముగిసే సమయానికి భారత్ 24 ఓవర్లలో వికెట్ నష్టపోయి 77 పరుగులు చేసింది. కెప్టెన్ రోహిత్ శర్మ (69 బంతుల్లో 56 బ్యాటింగ్; 9 ఫోర్లు, 1 సిక్స్), రవిచంద్రన్ అశ్విన్ (0 బ్యాటింగ్) క్రీజులో ఉన్నారు. కేఎల్ రాహుల్ (71 బంతుల్లో 20; 1 ఫోర్) ఆట మరికాసేపట్లో ముగస్తుందనగా అరంగేట్రం బౌలర్ మర్ఫీకి రిటర్న్ క్యాచ్ ఇచ్చి పెవిలియన్ కు చేరాడు. భారత్ ప్రస్తుతం 100 పరుగులు వెనుకంజలో ఉంది.
మూడో సెషన్ లో బ్యాటింగ్ కు దిగిన భారత్ ను ఆస్ట్రేలియా బౌలర్లు ఏ మాత్రం ఇబ్బంది పెట్టలేకపోయారు. కమిన్స్ వేసిన తొలి ఓవర్ లో రోహిత్ శర్మ 3 ఫోర్లు బాది భారత్ కు అదిరిపోయే ఆరంభాన్ని ఇచ్చాడు. మరో ఓపెనర్ రాహుల్ మాత్రం తీవ్రంగా ఇబ్బంది పడ్డాడు. తాను పూర్ ఫామ్ లో ఉన్నానని తన బ్యాటింగ్ తో మరోసారి చెప్పాడు. అయితే రోహిత్ మాత్రం స్వేచ్ఛగా బ్యాటింగ్ చేస్తూ పరుగులు రాబట్టాడు. ఈ క్రమంలో రోహిత్ అర్ధ సెంచరీ చేశాడు. మరికొద్ది సేపట్లో తొలి రోజు ఆట ముగుస్తుందనగా రాహుల్ మర్ఫీ బౌలింగ్ లో కాటన్ బౌల్డ్ అయ్యాడు. దాంతో భారత్ 76 పరుగుల వద్ద తొలి వికెట్ ను కోల్పోయింది. అనంతరం మరో వికెట్ పడకుండా టీమిండియా రోజును ముగించింది.
అంతకుముందు తొలుత బ్యాటింగ్ చేసిన ఆస్ట్రేలియా తమ తొలి ఇన్నింగ్స్ లో 63.5 ఓవర్లలో 177 పరుగులకు ఆలౌటైంది. జడేజా 5 వికెట్లతో చెలరేగాడు. అశ్విన్ 3 వికెట్లు తీశాడు. షమీ, సిరాజ్ లు చెరో వికెట్ సాధించారు. ఆసీస్ తరఫున మార్నస్ లబుషేన్ (123 బంతుల్లో 49; 8 ఫోర్లు) టాప్ స్కోరర్ గా నిలిచాడు. స్టీవ్ స్మిత్ (37), అలెక్స్ క్యారీ (36), హ్యాండ్స్ కాంబ్ (31) మినహా మిగిలిన ప్లేయర్లు సింగిల్ డిజిట్ కే వెనుదిరిగారు. టాస్ గెలిచి బ్యాటింగ్ కు దిగిన ఆస్ట్రేలియాను సిరాజ్, షమీలు దెబ్బ తీశారు. ఖవాజా (1)ని సిరాజ్ అవుట్ చేస్తే.. వార్నర్ (1)ని షమీ అవుట్ చేశాడు.
అయితే మార్నస్ లబుషేన్, స్టీవ్ స్మిత్ లు ఆడటంతో లంచ్ విరామానికి ఆసీస్ 76/2గా నిలిచింది. అయితే రెండో సెషన్ లో ఆస్ట్రేలియా కుప్పకూలింది. లబుషేన్ (49) అర్ధ సెంచరీ చేసేలా కనిపించాడు. అయితే స్పిన్ ను బాగా ఆడుతున్నా అనే అత్మవిశ్వాసం కాస్తా.. అతి విశ్వాసంగా అతడికి మారింది. దాంతో జడేజా బౌలింగ్ లో ముందుకు వచ్చి ఆడే ప్రయత్నం చేసి స్టంపౌట్ అయ్యాడు. ఇక్కడి నుంచి ఆస్ట్రేలియా పతనం మొదలైంది. ఆ తర్వాతి బంతికే రేన్ షా (0) ఎల్బీగా అవుటయ్యాడు. మరికాసేపటికే స్టీవ్ స్మిత్ (37) జడేజా బౌలింగ్ లో క్లీన్ బౌల్డ్ అయ్యాడు.
అయితే ఇక్కడి నుంచి కాసేపు క్యారీ (36), హ్యాండ్స్ కాబ్ లు జట్టును ముందుకు నడిపారు. ముఖ్యంగా క్యారీ రివర్స్ స్వీప్ షాట్లతో వేగంగా పరుగులు సాధించాడు. పలు బౌండరీలను కూడా సాధించాడు. అయితే అశ్విన్ బౌలింగ్ లో రివర్స్ స్వీప్ కు వెళ్లి వికెట్ల మీదకు ఆడుకున్నాడు. కెప్టెన్ కమిన్స్ (6), అరంగేట్రం హీరో మర్పీ (0) వెంట వెంటనే అవుటయ్యారు. టీ విరామం తర్వాత హ్యాండ్స్ కాంబ్ అవుటయ్యాక ఆసీస్ ఇన్నింగ్స్ ముగిసేందుకు ఎక్కువ సమయం పట్టలేదు.
