‘పుష్ప’లో ఆ సీన్‌కి స్ఫూర్తి ఇదిగో.. లెక్కల మాస్టారు రీసెర్చ్ మామూలుగా ఉండదుగా..!

సినిమా అంటేనే కల్పితం. అయితే, ఆ కల్పితానికి కాస్త లాజిక్ తోడైతే ప్రేక్షకులు స్వాగతిస్తారు. ఒక్కోసారి దర్శకులు హీరోయిజాన్ని మరో స్థాయికి తీసుకెళ్లడానికి లాజిక్‌ను పక్కన పెట్టేస్తుంటారు. కానీ, ప్రస్తుతం దర్శకులు చాలా లాజిక్‌గా ఆలోచిస్తున్నారు. ప్రేక్షకులకు ఎక్కడ దొరికిపోతామో అనే భయంతో చాలా రీసెర్చ్ చేసి మరీ సన్నివేశాలను రాసుకుంటున్నారు. ఇలా సినిమా మొదలుపెట్టడానికి ముందు బాగా పరిశోధన చేసే దర్శకుల్లో సుకుమార్ ఒకరు. అల్లు అర్జున్ (Allu Arjun) హీరోగా సుకుమార్ దర్శకత్వంలో వచ్చిన ‘పుష్ప’ (Pushpa) సినిమా ప్రేక్షకులకు బాగా రీచ్ అయ్యింది. దీనికి కారణం ఆ సినిమాలో ఉన్న కొత్తదనం.

‘పుష్ప’ సినిమాలో అల్లు అర్జున్‌ను కొత్తగా ఆవిష్కరించడమే కాదు.. ఆ చిత్రంలో చాలా సన్నివేశాలను ఇది వరకు ప్రేక్షకులు చూడని విధంగా చూపించారు. అందుకే, దేశ వ్యాప్తంగా అన్ని భాషల ప్రేక్షకులను ఈ సినిమా ఆకట్టుకుంది. అయితే, ఎర్రచందనం దుంగలు ఫారెస్ట్ ఆఫీసర్‌కు దొరకకుండా ఉండటానికి పుష్పరాజ్ వాటిని నదిలోకి తోసేసే సీన్ ఒకటి ఉంది. నదిలో తేలియాడుతూ వెళ్లే దుంగలను డ్యామ్ గేట్లు మూయించి తీసుకెళ్లిపోతారు. అయితే, ఈ సన్నివేశం చూపినప్పుడు కొంత మంది ప్రేక్షకులు సుకుమార్ క్రియేటివిటీని పొగిడారు. మరికొందరు, దుంగలు నీటిపై తేలుతాయా అని అనుమానం వ్యక్తం చేశారు.

అయితే, నీటిని ఆధారంగా చేసుకుని కలపను రవాణా చేయడం అనేది కొత్త ఆలోచన కాదని.. ఇది చాలా పాత పద్ధతి అని తెలంగాణకు చెందిన ఇండియన్ ఫారెస్ట్ సర్వీస్ అధికారి ఒకరు స్పష్టం చేశారు. ప్రిన్సిపల్ చీఫ్ కన్జర్వేటర్ ఆఫ్ ఫారెస్ట్స్‌ మోహన్ చంద్ర పర్గాయిన్ తాజాగా ఒక వీడియోను ట్వీట్ చేశారు. జమ్మూలోని పర్వత ప్రాంతాల్లో కలపను నీటి ద్వారా ఎలా రవాణా చేస్తారో స్పష్టం చేసే వీడియో అది. ఇప్పటికీ జమ్మూలోని పర్వత ప్రాంతాల్లో వాగుల ద్వారా కలపను రవాణా చేస్తున్నారు. నీటిలో తేలియాడుతూ పర్వత ప్రాంతాల నుంచి కిందికి దుంగలు ప్రయాణిస్తుంటాయి.

ఇదే పద్ధతిని ‘పుష్ప’ సినిమాలో దర్శకుడు సుకుమారు ప్రయోగించారు. మోహన్ చంద్ర చేసిన ట్వీట్‌కు నెటిజన్లు కూడా ‘పుష్ప’ సినిమాలో ఇదే చూపించారని కామెంట్లు పెడుతున్నారు. అయితే, బ్రిటిష్ కాలంలోనే ఉత్తరాఖండ్‌లోని ఉత్తరకాశీ నుంచి దేవదార్ వరకు దుంగలను గంగా నది ద్వారా ఇలాగే రవాణా చేసేవారట. గంగా నది ప్రవాహం తీవ్రంగా ఉండేది కాబట్టి దాన్ని కలపకు ప్రధాన రవాణ వనరుగా వాడుకున్నారట. కాబట్టి, సుకుమార్ ఎంతో పరిశోధన చేసే ‘పుష్ప’లో ఆ సన్నివేశం ప్లాన్ చేసి ఉంటారు. మొత్తం మీద మోహన్ చంద్ర ట్వీట్‌తో ‘పుష్ప’ సన్నివేశం గురించి సోషల్ మీడియాలో మళ్లీ చర్చ జరుగుతోంది.

Leave a Reply

Your email address will not be published. Required fields are marked *