IT Layoffs 2023: ఆర్థిక మాంద్యం భయాలు కమ్ముకున్న వేళ టెక్, ఐటీ, స్టార్టప్ కంపెనీలు ఖర్చుల నియంత్రణ చర్యలకు ఉపక్రమించాయి. ఇప్పటికే గూగుల్, మైక్రోసాఫ్ట్, అమెజాన్ వంటి దిగ్గజ సంస్థలు వేలాది మందిని ఉద్యోగాల్లోంచి తీసేశాయి. అయితే, ఈ ప్రభావం భారత్‌పై తక్కువగానే ఉందని చెప్పాలి. కానీ, ఆ సంతోషం మూన్నాళ్ల ముచ్చటే కానుంది. భారత్‌లో ఐటీ, స్టార్టప్స్ కంపెనీలు ఉద్యోగాల తొలగింపునకు సిద్ధమవుతున్నట్లు ఓ నివేదిక వెల్లడించింది. ఇండియాకు చెందిన ఐటీ, స్టార్టప్ సెక్టార్ వచ్చే ఆరు నెలల్లో 15,000 నుంచి 20,000 వరకు ఉద్యోగులను తొలగించనున్నాయనే కీలక విషయాన్ని వెల్లడించింది.
భారత ఐటీ, స్టార్టప్ కంపోనీలకు డిమాండ్ తగ్గడం, జీత భత్యాలు అధికంగా ఉండడం వల్ల ఉద్యోగాల కోత తప్పడం లేదని క్వెస్ కార్ప అనే నియామకాల కన్సల్టెన్సీ సంస్థ పేర్కొంది. కొద్ది నెలల పాటు కొత్త ఉద్యోగాల నియామకాలను నిలిపివేయడం సహా కొత్త వ్యాపారాల జోలికి వెళ్లకూడదని కంపెనీలు నిర్ణయం తీసుకున్నట్లు అభిప్రాయపడింది. అయితే, కొన్ని ఐటీ, స్టార్టప్ కంపెనీలు ఖర్చులను తగ్గించుకునే ప్రక్రియలో భాగంగా ఉద్యోగులను తొలగిస్తే.. కొన్ని మాత్రం కొత్త వారిని నియమించుకునే అవకాశం ఉందని తెలిపింది.
97836180
క్వెస్ కార్పసంస్థకు చెందిన ఓ అధికారి ఈ విషయంపై కీలక అంశాలు వెల్లడించారు. ‘ వచ్చే కొన్ని త్రైమాసికాల్లో సుమారు 20,000 ఉద్యోగాల కోత ఉండనుందని అంచనా వేస్తున్నాం. గత ఏడాది నుంచి కంపెనీలు నైపుణ్య వంతులను నియమించుకోవడంలో వెనకబడ్డాయి. అలాగే.. ఒక్కసారిగా ఎక్కువ మందిని ఉద్యోగాల్లోకి తీసుకోవడం, ద్రవ్యోల్బణం, మార్కెట్ నిబంధనలు పక్కనబెట్టి ఎక్కువ మొత్తంలో జీతాలు చెల్లించడం వంటి సమస్యలను కంపెనీలు ఎదుర్కొంటున్నాయి.’ అని తెలిపారు. మరోవైపు.. 2022-23 ఆర్థిక ఏడాదిలో ఇప్పటి వరకు భారత ఐటీ, స్టార్టప్ సంస్థల్లో 20 వేల మందికిపైగా ఉద్యోగులను తొలగించినట్లు తెలిపారు. 2023, జనవరిలోనే 14,000 మంది ఉపాధి కోల్పోయారని వెల్లడించారు.
ప్రపంచ వ్యాప్తంగా టెక్, ఐటీ రంగాల్లో పని చేస్తున్న ఉద్యోగుల పరిస్థితి దారుణంగా మారింది. ఉద్యోగం ఎప్పుడు ఊడుతుందోననే భయంతో కాలం వెల్లదీస్తున్నారు. ఇప్పటికే గూగుల్, మెటా, మైక్రోసాఫ్ట్, అమెజాన్, సహా కీలక సంస్థలు వేల సంఖ్యలో ఉద్యోగులను ఇళ్లకు పంపించాయి. 2023 ప్రారంభమైన నెలన్నర రోజుల్లోనే ఏకంగా లక్ష మందికిపైగా టెక్, ఐటీ ఉద్యోగాలు పోయాయంటే పరిస్థితి ఎంత దారుణంగా ఉందో అర్థం చేసుకోవచ్చు. రానున్న రోజుల్లో ఈ పరిస్థితి మరింత తీవ్రంగా కానుందనే ఊహాగానాలు వినబడుతున్నాయి. ఈ క్రమంలో కొన్ని సంస్థలు కొత్త నియామకాలు చేపట్టేందుకు సిద్ధమవుతాయన్న వార్తలు కాస్త ఊరట కలిగించే విషయం.
97806170
97779193
97732635
