WTC ఫైనల్‌ వేళ టీమిండియాలో గాయాల కలవరం.. మరో ఆటగాడు దూరం!

ఐపీఎల్ లీగ్ ముగిసిన కొన్ని రోజుల్లోనే టిమిండియా ప్రతిష్టాత్మక ప్రపంచ టెస్ట్ ఛాంపియన్‌షిప్ ఫైనల్ ఆడనుంది. ఇంగ్లాండ్‌లోని ఓవల్‌లో భారత్ – ఆస్ట్రేలియా జట్ల మధ్య మ్యాచు జరగనుంది. జూన్ 7వ తేదీ నుంచి 11వ తేదీ వరకు ఫైనల్ మ్యాచ్ జరుగనుంది. వరల్డ్ టెస్టు ఛాంపియన్ షిప్‌ కోసం ఇప్పటికే ఇరు దేశాలు తమ టీమ్‌లను ప్రకటించాయి. రోహిత్ శర్మ సారథ్యంలో టీమిండియా డబ్ల్యూటీసీ ఫైనల్స్ ఆడనుంది. ఇప్పటికే స్టార్ ప్లేయర్ విరాట్ కోహ్లీ, మహ్మద్ సిరాజ్ సహా కొందరు క్రికెటర్లు లండన్‌కు చేరుకున్నారు. ఐపీఎల్ ఫైనల్ మ్యాచు పూర్తయిన వెంటనే మిగతా ప్లేయర్లంతా బయలుదేరతారు.

ప్రతిష్టాత్మక మ్యాచ్ ముందర భారత జట్టును గాయాల బెడద వేధిస్తోంది. ఇప్పటికే ప్రధాన పేసర్ బుమ్రా, బ్యాటర్ కేఎల్ రాహుల్ దూరమయ్యారు. కొందరు పూర్తి స్థాయి ఫిట్‌నెస్ సాధించాల్సి ఉంది. ఈ పరిస్థితుల్లో డబ్ల్యూటీసీ ఫైనల్‌కు ప్రకటించిన జట్టులో ఉన్న ఇషాన్ కిషన్ కూడా గాయపడటం టీమ్ మేనేజ్‌మెంట్‌ను కలవరపెడుతోంది.

ఐపీఎల్‌లో భాగంగా శుక్రవారం జరిగిన క్వాలిఫయర్-2 మ్యాచులో లెఫ్ట్ హ్యాండర్ ఇషాన్ కిషన్ గాయపడ్డాడు. గుజరాత్ బ్యాటింగ్ సమయంలో 16 ఓవర్ పూర్తైన తర్వాత స్ట్రైకింగ్ ఎండ్ వైపు వెళ్తున్న ఇషాన్ కిషన్‌ను.. అనుకోకుండా ముంబయి పేసర్ క్రిస్ జోర్దాన్ ఢీకొట్టాడు. క్యాప్ తలపైకి ఎత్తేందుకు జోర్దాన్ చేయి పైకి ఎత్తగా అటుగా వస్తున్న ఇషాన్ కిషన్‌ కంటికి బలంగా తాకింది.

దీంతో నొప్పితో బాధపడ్డ ఇషాన్ కిషన్.. మళ్లీ మైదానంలో కనిపించలేదు. కంటిపై చేయి పెట్టుకొని డగౌట్‌కి వెళ్లిపోయాడు. గాయం తర్వాత బ్యాటింగ్‌ సైతం చేయలేదు. ఇషాన్ కిషన్ స్థానంలో విష్ణు వినోద్ బ్యాటింగ్‌కు వచ్చాడు. ఇషాన్ కిషన్ గాయం పట్ల బీసీసీఐ అప్రమత్తమైంది. గాయం తీవ్రత ఏంటి అనే విషయాలపై ఆరా తీస్తోంది.

గాయపడ్డ కేఎల్ రాహుల్ స్థానంలో డబ్ల్యూటీసీ ఫైనల్స్‌కు ఇషాన్ కిషన్‌ను ఎంపిక చేయగా.. అతడు కూడా గాయపడటం జట్టును కలవరపెడుతోంది. రెండు మూడ్రోజుల్లో లండన్‌కు బయలుదేరాల్సి ఉండగా.. ఈ ఘటన జరగడం ఆందోళన కలిగిస్తోంది. గాయం తీవ్రతపై పూర్తి నివేదిక వచ్చాకే.. ఇషాన్ కిషన్ లండన్ వెళ్తాడా? లేదా వేరే వాళ్లను ఎంపిక చేయాలా అనేదానిపై బీసీసీఐ నిర్ణయం తీసుకునే అవకాశం ఉంది.

డబ్ల్యూటీసీ ఫైనల్ కోసం ఎంపికైన ఆటగాళ్లు:

రోహిత్ శర్మ (కెప్టెన్), శుభ్‌మన్ గిల్, చటేశ్వర్ పుజారా, విరాట్ కోహ్లీ, అజింక్యా రహానే, కేఎస్ భరత్ (వికెట్ కీపర్), రవిచంద్రన్ అశ్విన్, రవీంద్ర జడేజా, అక్షర్ పటేల్, శార్దూల్ ఠాకూర్, మహ్మద్ షమీ, మహ్మద్ సిరాజ్, ఉమేష్ యాదవ్, జయదేవ్ ఉనద్కత్, ఇషాన్ కిషన్ (వికెట్ కీపర్)

స్టాండ్‌బై ప్లేయర్లు:

రుతురాజ్ గైక్వాడ్, ముఖేష్ కుమార్, సూర్యకుమార్ యాదవ్‌

100528765

Leave a Reply

Your email address will not be published. Required fields are marked *