ఎస్.ఎస్.రాజమౌళి దర్శకత్వంలో వచ్చిన బ్లాక్ బస్టర్ మూవీ RRRలో జూనియర్ ఎన్టీఆర్ (Jr NTR) కొమురం భీముడు (భీమ్)గా అద్భుతమైన నటనను ప్రదర్శించారు. ఎన్టీఆర్ నటనకు గానూ ఆయనకి ఆస్కార్ వస్తుందని అభిమాను భావించారు. కానీ రాలేదు. ఆ తరవాత జాతీయ చలన చిత్ర పురస్కారం దక్కుతుందని ఆశపడ్డారు. అది కూడా దక్కలేదు. కానీ, మొత్తానికి ఒక ప్రతిష్టాత్మక అవార్డు ఎన్టీఆర్‌ను వరించింది. అదే ‘సైమా’ అవార్డు.
దక్షిణ భారత సినిమాలకు ఏటా సైమా అవార్డులు ప్రదానం చేస్తున్న సంగతి తెలిసిందే. దుబాయ్‌లో ఘనంగా ఈ ప్రదానోత్సవ వేడుకను నిర్వహిస్తారు. ఈ ఏడాదికి కూడా నిన్న, ఈరోజు (సెప్టెంబర్ 15, 16 తేదీలు) సైమా అవార్డులను ప్రదానోత్సవ వేడుకలు జరుగుతున్నాయి. ఈ ప్రదానోత్సవంలో తెలుగు నుంచి ఉత్తమ నటుడిగా నిన్న జూనియర్ ఎన్టీఆర్ అవార్డు అందుకున్నారు. RRR సినిమాలో నటనకు గాను ఈ అవార్డు దక్కింది. ఎన్టీఆర్ అవార్డు స్వీకరిస్తున్న ఫొటోలు, వేదికపై ఆయన స్పీచ్ ప్రస్తుతం సోషల్ మీడియాలో వైరల్ అవుతున్నాయి.
అవార్డు తీసుకున్న అనంతరం ఎన్టీఆర్ మాట్లాడుతూ.. ‘నా ఒడుదుడుకుల్లో, నేను కిందపడ్డప్పుడల్లా నన్ను పట్టుకుని పైకి లేపినందుకు, నా కళ్ల వెంట వచ్చిన ప్రతి నీటి చుక్కకి వాళ్లు కూడా బాధ పడినందుకు, నేను నవ్వినప్పుడల్లా నాతో పాటు నవ్వినందుకు.. నా అభిమాన సోదరులందరికీ తల వంచి పాదాభివందనాలు’ అని అన్నారు. ఈ మాటలు ఇప్పుడు వైరల్ అవుతున్నాయి.
కాగా, జూనియర్ ఎన్టీఆర్ మొన్న రాత్రి ఫ్యామిలీతో కలిసి దుబాయ్‌కి పయనమైన సంగతి తెలిసిందే. తెలుగుదేశం పార్టీ అధినేత చంద్రబాబు నాయుడు జైలులో ఉంటే ఆయనకు సంఘీభావం కూడా తెలపని ఎన్టీఆర్.. ఆ విషయంలో కనీసం బాధపడుకుండా ఫ్యామిలీతో కలిసి షికారుకి వెళ్తున్నారంటూ టీడీపీ వర్గాలు ఆయన్ని విమర్శించాయి. ఎయిర్‌పోర్టులో కొడుకుతో కలిసి ఎన్టీఆర్ ఉన్న చిన్న వీడియోను వైరల్ చేశారు. నిన్నంతా సోషల్ మీడియాలో ఇదే రచ్చ. నిజానికి ఆయన దుబాయ్ వెళ్లింది ఈ అవార్డు తీసుకోవడానికి. ఇది తెలియక ఎన్టీఆర్‌పై దుమ్మెత్తిపోశారు.
దుబాయ్ నుంచి తిరిగి వచ్చాక కూడా చంద్రబాబు అరెస్టుపై జూనియర్ ఎన్టీఆర్ స్పందించకపోవచ్చు. ఒకవేళ స్పందించే ఉద్దేశం ఉంటే ఈ పాటికే స్పందించేవారు. కానీ ఈ రాజకీయాలు మనకొద్దు అనుకున్నారో ఏమో.. అన్నదమ్ములు కళ్యాణ్ రామ్, ఎన్టీఆర్ స్పందించలేదు. కానీ, హరికృష్ణ కుమార్తె సుహాసిని మాత్రం స్పందించారు. ఆమె తెలుగుదేశం పార్టీ నుంచి కూకట్‌పల్లి అసెంబ్లీ స్థానానికి పోటీ చేసి ఓడిపోయిన సంగతి తెలిసిందే.
